Derbi oldidan «Andijon»da birdamlik va o'zaro ishonch ruhi
Bugungi mashg'ulotdan so'ng «Andijon» klubi bosh direktori Ziyodbek Mashrapov murabbiylar shtabi va futbolchilar bilan uchrashib, jamoa bilan samimiy suhbatlashdi.
31 oktabr kuni Namanganda vodiy futboli muxlislari intiqlik bilan kutayotgan «Navbahor» — «Andijon» derbisi bo'lib o'tadi. Bunday uchrashuvlar o'zining alohida muhiti, hayajoni va futbolga bo'lgan mehr bilan ajralib turadi.
Bo'lajak bahs oldidan Ziyodbek Mashrapov futbolchilar bilan fikr almashib, ularni qo'llab-quvvatladi va jamoaga bo'lgan ishonchini bildirdi. Suhbat davomida «Andijon»ning har bir a'zosi umumiy maqsad yo'lida birlashishi, maydonga yaxshi kayfiyat, o'zaro ishonch va g'alabaga intilish bilan chiqishi muhimligi ta'kidlandi.
«Andijon»ning ortida doimo o'z jamoasiga mehr qo'ygan, uning quvonchiga sherik, qiyin damlarida esa tayanch bo'lishga tayyor muxlislar bor. Aynan shu mehr va qo'llab-quvvatlash jamoaning eng katta kuchlaridan biridir.
Oldinda muhim uchrashuv turibdi. Ammo futbolning go'zalligi shundaki, har bir yangi o'yin yangi imkoniyat, yangi hissiyot va yangi quvonch uchun eshik ochadi. Jamoamizga esa maydonda o'z o'yinidan zavq olib, bir-birini qo'llab-quvvatlab, bor mahoratini namoyon etishini tilaymiz.
Muxlislar fikri
